(تابع) بيان الرئيس جمال عبدالناصر في المؤتمر الصحفي لمراسلي الصحافة العربية والأجنبية

الرئيس: الوضع الحالي للاقتصاد المصري دي حكاية اتعملت وصدقتوها. وانتم اللي كتبتوا عليها وصدقتوها. أما إحنا عايشين وبنأكل وانتم قاعدين هنا تأكلوا، فيه عيش وفيه سلاطة وفيه لحمة، فيه فراخ. ده الاقتصاد المصري. لكن أسطورة الاقتصاد المصري اللي تعبان واللي كذا، ده كلام انتم اللي بتقولوه وانتم اللي بتصدقوه.

         طبعا إحنا عندنا مشاكل لأن إحنا دولة نامية، عايزين نبني بلدنا بسرعة. عاملين خطة السنة دي الاستثمارات فيها 400 مليون جنية، بنبني مصنع حديد وصلب، الاستثمارات اللي فيه لوحده 400 مليون جنيه، وأول مرحلة فيه حاتخلص سنة 71، يدينا 1.5 مليون طن حديد. ما احناش حانأخذ منه فوايد. بنينا السد العالي، حطينا فيه 400 مليون جينة، حا يدينا ابتداء من السنة دي 10 مليار كيلووات/ ساعة من الكهرباء، لسه مااستخدمناش الكهربا، ادانا مياه، مااستخدمناش هذه المياه.

         طبعا بيقابلنا نتيجة لهذا، نتيجة إن إحنا بنصنع بلدنا وبنطور بلدنا إن إحنا عايزين قروض وعايزين عملة صعبة علشان ننمي بلدنا، خصوصا إن إحنا عندنا زيادة في السكان مليون تقريبا كل سنة. إحنا عندنا احتياطي من الذهب وعندنا أيضا احتياطي من العملة الصعبة، احتياطي مش كبير ولكن الحالة الاقتصادية زي انتم ما بتكتبوا عليها في جرايدكم مش بالشكل ده، وزي يمكن التقارير اللي بتكتب عليها السفارات مش بالشكل ده. طبعا إحنا بنربط إلى حد ما الحزام على نفسنا، مفيش كماليات بنحاول السوق بيكون فيه كل الإنتاج مصري، ولكن نستطيع أن نضحي في سبيل المحافظة على كرامتنا وفي سبيل المحافظة على سيادتنا وفي سبيل المحافظة على حقوقنا. وأنا أعتقد أن الشعب المصري مستعد للتضحية والشعب العربي في كل مكان مستعد للتضحية.

السؤال الخامس والثلاثون: من توماس طومسون، ممثل مجلة لايف الأمريكية:

         هل طرأ أي تحسن على الموقف في الشرق الأوسط اليوم عما كان عليه منذ أسبوع قبل زيارة يوثانت؟

الرئيس: أنا مش شايف إن فيه أي تحسن، إحنا رجعنا حقوقنا - شلنا قوات الطوارئ الدولية وعدنا إلى خليج العقبة - باشرنا سيادتنا في خليج العقبة - فيه ناس بتهددنا بالحرب وفيه ناس بتهدد بالعدوان - إحنا قاعدين مستنيين - تاركين المبادأة لهم. اللي عايز يحاربنا يتفضل ييجي يحاربنا وإحنا مستعدين إن إحنا نرد عليه - أرى إن فيه ضجة مفتعلة تفتعلها أساسا الولايات المتحدة الأمريكية - تفتعلها أساسا لأنها تريد أن تساند إسرائيل وتريد أن تعطي إسرائيل الحق بتاعنا تعطية لإسرائيل - الولايات المتحدة الأمريكية سلحت إسرائيل، ادت أسلحة لإسرائيل وادت معونات لإسرائيل وادت دبابات لإسرائيل وادت طيارات لإسرائيل - وأنا كان فيه سؤال عندي دلوقت بيقول لي هل الموقف اتغير عن 11 سنة. آه الموقف اتغير عن 11 سنة. الأسلحة- الأول قالت لألمانيا تدي أسلحة لإسرائيل كهدايا، ودلوقت بتدي أسلحة لإسرائيل كهدايات، تديها طيارات، تديها دبابات، تديها صواريخ. طبعا ما أقدرش أقول أبدا إن الموقف تحسن.

<21>