(تابع) خطاب الرئيس جمال عبدالناصر، في اجتماع دعا إليه الاتحاد العام للعمال

مفيش ديكتاتورية طبقة من الطبقات واللي هو معناه إن إحنا بنحل مشاكلنا وتناقضاتنا الطبقية بالوسائل السلمية، مش بالوسائل الدموية واللي هو بيوصلنا إلى إذابة الفوارق بين الطبقات بطريقة سليمة. إحنا اتكلمنا قبل كده وأنا تكلمت عن الاتحاد الاشتراكي يوم 23 نوفمبر أو 23 يوليه، وقلنا عايزين نصلح ونصلح.

          أما رفع شعار حل الاتحاد الاشتراكي معناه إن إحنا نبقى في فراغ. رفع شعار حل مجلس الأمة يعني ايه؟ يعني برضه نربطه بحاجة ثانية مع شعار حل مجلس الأمة رفع شعار إلغاء نسبة الـ50% من العمال والفلاحين، لأن العمال والفلاحين ناس مش متعلمين ناس مش مثقفين ولا يصح لهم انهم يمثلوا في مجلس الأمة.

          إحنا ليه عملنا 50% عمال وفلاحين، علشان لا تستطيع قوى الثورة المضادة حتى إذا دخل منها عدد في مجلس الأمة أن يحول هذه الثورة عن طريق التشريع في مجلس الأمة إلى سلب مكاسب العمال والفلاحين أو إلى إنهاء الثورة الاشتراكية، ده السبب في الـ50% عمال وفلاحين.

          هذه هي الثورة الاشتراكية وهذا هو طريق التحول الاشتراكي وهذه هي الحرية، طبعاً الحرية زي ماقلنا هي حرية المواطن وحرية الوطن وقلنا أن الحرية كل الحرية للشعب لأبناء الشعب ليهم كل الحرية انهم بينتقدوا انهم يتكلموا انهم يناقشوا الأمور، لأن الأمور أمورهم وده واضح من بداية الطريق، وقلنا أيضاً إن إحنا لا يمكن إن إحنا نعطي الحرية لأعداء الشعب إذا حصل تآمر إذا حصل أي شئ، سواء من أقصى اليمين أو أقصى اليسار، يجب إن إحنا نواجه هذا بعنف وده اللي حصل سنة 65 لما تآمرت جماعات الإخوان علشان تهديم هذا البلد، مكنش فيه ولا واحد في المعتقل، ولكن نتيجة لهذا التآمر اضطرينا أيضاً زي ما قلت لكم قبل كده إن إحنا نعتقل عدد من الإخوان من جهاز التنظيم السري، الحقيقة اللي كان موجود قبل كده في مؤامرة سابقة وحكم عليه، وبعد كده أخذ عفو.. بدي أقول إن الثورة لابد أن تتصدى لعناصر الثورة المضادة، سواء كانت تمثل الرجعية أو تمثل أقصى اليمين أو تمثل أقصى اليسار المتطرف.

          الظروف اللي بنعيش فيها النهاردة تشجع الثورة المضادة.. ليه.. لأن إحنا قابلنا نكسة في 5 يونيه والاستعمار والصهيونية استطاعوا انهم يلحقوا بينا الهزيمة. طبعاً الرجعية تنتعش الرجعية تشعر إن أمامها فرصة ومن وراءها الاستعمار لتنقض على هذه الثورة، ويستغلوا مين يستغلوا الشعب الطيب الشعب البريء، وإحنا نعرف حتى في الماضي قبل الثورة يمكن العمال ضللوا بواسطة الرجعية والطلبة أيضاً ضللوا بواسطة الرجعية. أنا بأقول إن العملية بدأت عملية تلقائية وبدأت هنا في حلوان، وبدأت عملية تلقائية لما بدأت في الجامعة. ولكن بعد كده العملية ما أصبحتش عملية تلقائية. كل واحد يمكن في البلد ليه أوضاع تلقائية، وأنا برضه بأقول لإخواننا الطلبة في الجامعة قبل ما تنقاد وراء أي شعار شوف مين اللي بيردد هذا الشعار، ما كل واحد ليه أوضاع طبقية، طبعاً فيه ناس اتخدت أملاكهم، وفين ناس اتخدت أراضيهم، فيه ناس اتأممت مصانعهم، ودول أولادهم موجودين في أوساطتنا بيسمعوا مننا كلام ويروحوا في البيت يسمعوا كلام تاني

<9>