(تابع) خطاب الرئيس جمال عبدالناصر في كفر الدوار

نقرر عدم صلاحيتهم لمسئولياتهم، ولكن في مقابل ذلك شيئين. هناك كثيرون يفهمون ولا ينبغي أن نخلق من قوة العمل قوة معادية لقوة الادارة، أو نخلق من الإدارة قوة معادية للعمل، إحنا قلنا ليه نعمل ممثلين للعمال في مجلس الإدارة، علشان نجمع الإدارة مع العمال، علشان تكون الإدارة تقريباً هي إدارة ذاتية. وأظن اتعمل انتخابات مرة، ما اتعملتش الانتخابات بعد كده، ولابد لينا إن إحنا نجدد الانتخابات للأعضاء المنتخبين في مجالس الإدارة علشان يعبروا عن ارادتنا. ولكن الموضوع ما يبقاش مزايدات، يعني إذا طلعوا العمال أو الأعضاء المنتخبين في مجالس الإدارة وقالوا عايزين نأخذ الفلوس كلها ونوزعها على مهيات وعلاوات ومايبقاش فيه أرباح، طيب إحنا عايزين أرباح ليه؟ ماهو علشانكم وعلشان أولادكم وعلشان إخوانكم اللي حيطلعوا بكرة وعاوزين فرصة عمل في المصانع، يجب أن يكون هناك توافق بين الإدارة ومابين العمال، وده عمل سياسي، عمل سياسي على الإدارة وعلى النقابات العمالية. يجب على الإدارة أن تلتقي مع النقابات العمالية، يجب على الإدارة أن تقوم بدور سياسي، يجب على النقابات العمالية أن تقوم بدور سياسي واعي، وإحنا محتاجين جداً إلى المديرين وإلى الفنيين في هذا البلد وقيمة بلدنا الحقيقة القيمة اللي عندنا عن البلاد الأخرى اللي استقلت إن إحنا عندنا عدد كبير من الفنيين، عندنا عدد من المهندسين وعدد من الدارسين في البلاد الأجنبية كبير بيقدر يساعدنا في التخطيط وفي التصميم والإنشاء والتصنيع والزراعة. عندنا مهندس صناعي وعندنا مهندس زراعي، عندنا مهندسين ري. بدون دول إحنا ماكناش نقدر نبني مصانع ولا نعمل مصانع، كنا لازم نستورد خواجة من برة علشان ييجي يبني لنا المصنع. إذاً هؤلاء الناس لهم القيمة الفنية وهمه مين؟ ما همه أبناؤكم، هم أبناء العمال والفلاحين والمثقفين والرأسمالية الوطنية. ولكنا نطلب منهم أن لا ينسوا التزامهم الاجتماعي. يجب علينا أن نوعيهم وأن نحميهم وأن نتعاون معهم وإحنا في مرحلة تحول النهاردة من الرأسمالية إلى الاشتراكية لسه مابقيناش دولة اشتراكية علشان نبقى دولة اشتراكية لسه عايزين مراحل كبيرة من التحويل الاشتراكي. في مرحلة التحويل الاشتراكي دايماً تظهر مشاكل ويكون هناك بعض الأفكار القديمة عالقة ببعض الأذهان وبعض الرؤوس. وغرضي أقول إن مافيش تناقض مافيش تصادم بين قوى الشعب العاملة، ولكن قد يكون هناك تناقض بين قوى الشعب العاملة وإحنا بنعتبر العمال قوة طليعية من قوى الشعب العاملة، وبنعتبر الإدارة قوة أساسية من قوى الشعب العاملة، يمكن أن يكون هناك تناقض، والتناقض غير التصادم، وإن التناقض يحل بالتفاهم ويحل بالحوار ويحل بالنقاش ويحل بأن كل واحد يعرف إيه التزامه الاجتماعي وكل واحد يطبق ما جاء في الميثاق.

         إذا كان كل واحد يطبق ما جاء في الميثاق بالنسبة لتصرفه، سواء كان مدير أو كان عامل، نستطيع فعلاً أن نخلق من الإدارة ومن العمال قوة أساسية كبرى تساعد على زيادة الإنتاج، لا العمال يشتكوا من الإدارة وإلا الإدارة تشتكي أيضاً من العمال. والإدارة بتقول إن العمال بيغيبوا، والعمال بيقولوا إن الإدارة بتفصل فصل تعسفي. إحنا مش عايزين لا العمال يغيبوا وإلا الإدارة تفصل فصل تعسفي. إذاً دول عليهم واجب ودول عليهم واجب. أما الفنيين الموجودين عندنا هم ثروة ضخمة وثروة عالمية، وزي ما قلت حتى في أحد الاجتماعات اللي فاتت إن دي محاولات لسرقة الفنيين من البلاد النامية إلى البلاد المتقدمة والبلاد

<11>