(تابع) خطاب الرئيس جمال عبدالناصر، بمناسبة الذكرى التاسعة لقيام الوحدة بين مصر وسوريا

اللجوء السياسي لألمانيا والمخابرات الأمريكية ودتهم للملك فيصل، احتاس بيهم الملك فيصل يعمل بيهم إيه بعتهم للملك حسين، الملك حسين قطع الإذاعة وأعلن أن لجأ إليه اثنين طيارين مصريين ونفذ خطة المخابرات الأمريكية بالتفصيل وبالتمام. وبعدين إحنا أعلنا بالليل الساعة عشرة قصة الولدين الحقيقية رجعوا الملك حسين ووصفي التل اتكسفوا على دمهم وقالوا دول أصلاً جيين من ألمانيا مش جيين من اليمن، ودول بقى لهم في ألمانيا أربعة شهور وخليهم يشتموا فينا ويشتموا في الجيش وفي الطيران ويقولوا إن إحنا بنضرب نابالم وغازات سامة وعندنا طيارين روس بيروحوا يحاربوا في اليمن، طبعاً الواحد اللي يبيع ذمته ويأخد فلوس من السي. أي. إيه (C.I.A) اللي هم الملك حسين اللي بيقبض النهاردة من السي أي إيه وبيبني مصايف في العقبة جنب إسرائيل وما عرفش الفلوس دي جت له منين. طبعاً هو الواحد وعشرين مليون جنيه خبطهم وهل هو خبطهم والا خدتهم الدولة محدش يعرف لأن وزير الحربية الأمريكي قال أنهم ادوهم الأسلحة مجاناً وهو بيقول إن هو اشترى الأسلحة بفلوس، والأمريكان ادوا له الأسلحة مجاناً لأن طبعاً هو خدام للأمريكان والأمريكان ما يرضوش أبداً انهم يأخدوا منه فلوس ولكن بيدوا له الأسلحة مجانا واتنشر هذا الكلام، مش إحنا اللي قلناه دول الأمريكان هم اللي قالوه.

          إذن الأمريكان والإنجليز مع بورقيبة مع الملك حسين مع الملك فيصل مع شّاه إيران مع الحكومة الموجودة النهاردة في الجنوب المحتل اللي هي الحكومة العميلة، الحكومة اللي عينتها بريطانيا بعد أن منعت الوطنيين وطردت الوطنيين والعملاء في البحرين وفي المحميات البريطانية، كل دوله بيشتغلوا النهاردة يد واحدة وبيوجههم واحد والمخطط واحد وهذا المخطط هو أمريكا وبريطانيا الاستعمار والاستعمار الجديد.

          دي علاقة الاستعمار النهاردة بالرجعية العربية.

          لما نسأل نفسنا سؤال بسيط على طول الصورة وعمقها تنكشف أمامنا. السؤال البسيط ده ما هي علاقة الاستعمار بإسرائيل؟ العدو الأصلي العدو الأصلي والذي كان عدواناً مستمر كل يوم هو السبب الداعي إلى صيغة وحدة العمل من أجل فلسطين ومؤتمرات القمة..

          صلة الاستعمار بإسرائيل لا تحتاج إلى اجتهاد أو إلى استنتاج.. أمريكا وإنجلترا.. أقاموا إسرائيل وحموا إسرائيل والاستعمار يقوي إسرائيل وجود إسرائيل من أمريكا وبريطانيا والدول العربية الخاضعة للنفوذ الأمريكي.. اقتصاد إسرائيل يعتمد على اللي بيجي من أمريكا ومن ألمانيا ومن بريطانيا.. السلاح اللي عند إسرائيل بيجي من أمريكا.. كانت الأول بتجيب سلاح من فرنسا النهاردة أمريكا مجاناً أيضاً أو بتمن رمزي يسلح إسرائيل.. كل هذا كي تكون قاعدة للاستعمار في قلب الوطن العربي وحاجز يمنع تحقيق الوحدة في العالم العربي.

          أنا قلت لكم قبل كده إزاي الأمريكان هددونا من أكثر من سنتين وطلبوا مننا إن إحنا نمتنع عن أي نشاط ذري وندي الأمريكان حق التفتيش.. عندنا في مصر علشان يتأكدوا إن معندناش أي نشاط ذري،

<11>