(تابع) خطاب الرئيس جمال عبدالناصر، بمناسبة الذكرى التاسعة لقيام الوحدة بين مصر وسوريا

علينا اقتصادياً ما ندفعلوش الديون اللي علينا ونخليه يجري ورانا يقلنا ادفعوا اللي عليكوا وعملنا كده وقعدوا يهاجمونا أهو ما بيدفعوش وعاوزين يتفاوضوا قلنا اللي بيتفاوضوا معانا ويقبلوا شروطنا فندفع لهم الديون- اللي ما بيقبلوش فما بندفعش اعملوا اللي انتم عايزين تعملوه- قالوا حاينشروا في الجرايد وحايشهروا بينا- قلنا لهم انشروا إحنا بتهمنا مصر- بيهمنا هنا القاعدة الصلبة- انشروا 500 مقالة في لندن و500 مقالة في نيويورك ما بيهمناش قولوا اللي انتوا عايزين تقولوه واللي إحنا عايزين نقوله بنمشيه.

         البلد بقه النهاردة من 10 سنين كان فيه احتلال بريطاني- كان فيه استعمار وكانت كلمة بريطانيا قبل الثورة حاسمة وكلمة أمريكا حاسمة- والبلد ده خرج منه الاستعمار وبعده بشهرين رجعوا تاني اعتدوا علينا- وحاولوا يغزونا من جديد- هذا البلد اللي بيقولوا علينا مفلسين وجعانين ومش لاقيين نأكل- إحنا عملنا في الـ15 سنة اللي فاتوا رفعنا العمال من 3.5 مليون عامل إلى 7.5 مليون عامل- عدد السكان من 20 مليون إلى 30 مليون- إحنا بنقول مش عايزين عدد السكان علشان نيسر السُبُل، الدخل القومي من 800 مليون جنيه إلى 2000 مليون جنيه- الناتج القومي من 1800 مليون جنيه إلى 2700 مليون جنيه- كل حاجة المصانع- الأراضي الزراعية صلحنا 700 ألف فدان- السد العالي بنيناه غصب عن الأمريكان - بنعمل في كل مكان كطليعة من طلائع الثورة الوطنية- حققنا الاستقلال الاقتصادي إلى أقصى مدى استطاع الشعب أو أي شعب في العالم أن يصل إليه- أممنا المصالح الأجنبية- البنوك الأجنبية وشركات التأمين- وقنال السويس أولاً- وبعد كده المصانع الأجنبية وشركات التجارة- وأممنا التجارة الخارجية كلها ووضعنا وسائل الإنتاج تحت سيطرة الشعب وأصبح اقتصادنا اللي كان في أيد الأجانب وطني 100% وصلنا في التحول الاشتراكي إلى حد يثير اهتمام الكثيرين في العالم الذي تتطلع شعوبه إلى العدالة الاجتماعية- ما بنقلش هذا الكلام بادعاء ولكن كل واحد بييجي يشوف التجربة الاشتراكية هنا بيطلع يتكلم عنها كلام بارد- في البلد ده اللي كان 0.5% من سكانه بياخدوا نصف دخله القومي- سقط المجتمع الـ0.5% تحالف الإقطاع ورأس المال- وأسقط السيطرة المستغلة وأقام مجتمع قوى الشعب العامل- مجتمع سيطرة كل الشعب على كل مصادر الإنتاج- وحق الشعب الكامل في الخدمات- خدمات التعليم وخدمات العلاج والتأمينات الاجتماعية.

         طبعاً وصلنا في النمو الذي هو سند تحقيق الاشتراكية إلى حد يهددنا أحياناً بأنه أكتر من قدرتنا- ده الحقيقة اللي مخليهم بره يقولوا علينا إن إحنا تعبانين- الحقيقة نقدر نوقف التنمية ونستريح شوية بس حيبقى قدامنا بعد كده مشاكل مش حاقدر أشغل ولادكم كلهم اللي بيتخرجوا من الجامعة ومن المعاهد أو بيتخرجوا من مراكز التدريب- وإحنا عاوزين إيه؟ ما إحنا عايزين نشغل الأولاد ونجوزهم- ولا يمكن- يعني كل واحد يطلع يلاقي ولاده- كل واحد عنده بيت- كل واحد ابنه بيشتغل مش قاعد في البيت زي المصيبة- كل واحد بنته بتتجوز مش قاعدة في البيت مصيبة في البيت فعلشان نوصل كده إيه- أهوه ده اللي بنقول عليه مجتمع الرفاهية- لازم نشغل كل الأولاد- كل اللي بيتخرجوا من الجامعة لازم نشغلهم، وإحنا الحقيقة لغاية النهاردة فيه ناس بنشغلهم ما احناش عايزينهم- ودول طبعاً بيسببوا مشكلة - وإذن لازم نحل هذه المشكلة -

<19>