(تابع) خطاب الرئيس جمال عبدالناصر، بمناسبة الذكرى التاسعة لقيام الوحدة بين مصر وسوريا

يضربونا من بره عايزين يخلقوا لنا مشاكل في داخلنا ويخلونا نفقد الثقة في أنفسنا وإحنا بنقول هذا معناه إن إحنا يجب أن نسرع أكثر وننمي بقوى أكبر نمشي في الزراعة والصناعة بقوة أكثر علشان نزود الدخل القومي ونزود الإنتاج ويمكن ننقص شوية في الخدمات في السنة اللي جاية والسنة اللي بعديها علشان نعوض الضغط اللي حصل علينا ده ومانوقفش العمل في الإنتاج ما نوقفش العمل في الصناعة ولا الزراعة ولا المواصلات وعايزين نتحمل شوية ولكن ننجح منها تنفيذ خطتنا عايزين في الأرض الجديدة نصلح كل سنة 150.000 فدان ونستزرع الأرض اللي اتصلحت، الصناعة الثقيلة نعمل مجمع الحديد والصلب اللي المرحلة الأولى منه حا تدينا 4/3 مليون طن، في المرحلة الثانية تدينا كمان 4/3 مليون طن يعني بنضيف على الحديد والصلب مليون ونصف مليون طن، وبهذا طبعاً ده عايز استثمارات وبيلقي علينا أعباء وليس أمامنا إلا أن نختار الطريق الصعب. ومن حسن الحظ أن ربنا معانا في كل هذه المراحل اللي إحنا بنمشي فيها في الوقت اللي بنواجه فيه التحدي البترول بيطلع في الشرق وفي الغرب إحنا اللي بنطلعه.

(أحد الحضور يزغرد) فيرد عليه الرئيس

          دي مناسبة معقولة يعني عندنا بترول 7 ملايين طن بناخد منهم حوالي 25 مليون جنيه، السنة اللي فاتت طلع بترول حقل مرجان تقديراته محققة ويبدأ العمل فيها قبل يوليه السنة دي وتصل طاقاتها السنة الجاية إلى 7.5 مليون طن تقريباً تدينا حوالي 30 مليون جنيه. تفجر البترول في حقل شقير، تفجر البترول في البحر الأحمر تجاه رأس غارب، تفجر البترول في الصحراء الغربية في العلمين، وماهو موجود أمامنا الآن فعلاً ومحقق. طبعاً في عمليات بحث أخرى ما بنتكلمش عليها، المحقق حتى اليوم يجعلنا نتطلع إلى إنتاج كلي من البترول سنة 70 في حدود 30 مليون طن تعطينا حوالي 100 مليون جنيه.

          قيمة ما يصل إلينا وإلى أيدينا من الثروة إنه بيبني لقواعد الإنتاج لا نتقاسمه حفنة من الأمراء ولا يستخدم في إقامة القصور ولا يفتح للقلة مجالات للبذخ على حساب الأغلبية. الفلوس دي للشعب مش للملك فيصل ولا لأمراء الملك فيصل. إحنا والحمد لله بنزيد في الرعاية ونزيد استهلاك الأدوية من 4 ملايين جنيه بقى 34 مليون جنيه. نسبة المواليد في الأطفال بتقل آخر تعداد عملوه في السعودية لقوا عدد السكان 3 ملايين. إحنا كنا فكرين إن عدد السكان 7 ملايين ولكن لا فيه رعاية طبية ولا فيه حاجة ومتروكة العيشة القبلية البدوية. طبعاً ولكن اللي بيتمتع بالطب واللي بيتمتع بالرعاية واللي بيتمتع بالفلوس هم الملك فيصل والأمراء، وأيضاً الناس اللي بيخدموهم واللي بيتعاونوا معاهم. ما نفعله داخل وطننا كقوة ثورية نتمناه لكل وطن عربي يعمل ويناضل من أجل الشعب العربي. قدامنا شعوب عربية بدأوا الثوار يصلوا إلى السلطة ويتولوا أمورهم. إحنا ثورة الجزائر انتصرت ونتمنى لها النجاح. الثورة في العراق انتصرت. الشعب السوري قضى على الرجعية وأعوان الاستعمار وسائر في طريقه الوطني ونحن نلتقي مع سوريا. العراق أيضاً يقف ضد الرجعية والاستعمار، اليمن أيضاً يقف ضد الرجعية والاستعمار. النهاردة اليمن فيه استقرار كامل وهو ده اللي مخليهم يشعروا بالهستيريا واللي مخلي مستر ويلسون كل يوم يؤجر له واحد يعمل له مؤتمر صحفي في

<22>