(تابع) خطاب الرئيس جمال عبدالناصر، بمناسبة عيد العمال في شبرا الخيمة

طالما فيه ثورة حتلاقي ثورة مضادة- الثورة ضد الاستغلال المستغلين الموجودين- اللي كانوا موجودين بنخلص عليهم- يمكن بيطلعوا مستغلين جداد- يطلع واحد مستغل جديد وكان ماشي وبقه النهاردة أهوه عايز يشتري له شوية أراضي وعايز يعمله 50 فدان أو 100 فدان وعايز يبني له عمارة- وعايز يسف له شوية فلوس- علشان يبقى هوه مستغل جديد، ويقول لك أنا ماشي مع الثورة ومن تحت لتحت تجده أكبر أعوان الثورة المضادة- علينا أن نكشف عناصر الثورة المضادة في كل مكان ونقضي عليها من السنة اللي فاتت. السنة اللي فاتت مات الشهيد صلاح حسين في كمشيش ونبهنا مات إزاي- قتل. قتل بعد 14 سنة من الثورة بأيدي الإقطاع- في كمشيش في الوجه البحري هنا- حتى مش في مجاهل الصعيد- جنبنا.. جنب القاهرة- وجنب دايرة أنور السادات، وإزاي الكلام ده يحصل معناه إيه؟ معناه إن إحنا فعلاً كنا نايمين على الثورة المضادة اللي موجودة في البلد- إذا كانوا الإقطاعيين بيطلعوا ويموتوا عيني عينك جنب دايرة أنور السادات، وفي المنوفية واحد فلاح لأنه بينادي بحق الفلاحين وبينادي بإنسانية الفلاحين ما عملهمش حاجة الراجل.. الإقطاعيين دول أخذنا أرضهم واتحطوا تحت الحراسة ولكن فضلوا ملوك زي ما كانوا وأكثر. إذن الثورة المضادة، وأنا أما أتكلم وأقول الثورة المضادة يعني بأقول إنها ضدي- أبداً- الثورة المضادة في هذا اتجهت لمين؟ الشخص اللي قام يطالب بمطالب بلده، الشخص اللي قام يطالب بمطالب الفلاحين. صلاح حسين الفلاح اللي هو مابيعملش حاجة ماهواش يعني واحد راجل متوسط- راجل من أبناء الوطن وقف يطالب بحقوق إخوانه- راجل فلاح، الثورة المضادة تقتله- تقول لك نكتم صوته- وده اللي أنا بأعنيه بالثورة المضادة، ولكن ده ساعدنا على أن تقوم لجنة تصفية الإقطاع السنة اللي فاتت علشان الثورة أيضاً تعمل إذا كانت الثورة المضادة تعمل والثورة لا تعمل.

          إذن الثورة المضادة تستطيع أن تبسط نفوذها- ووجدنا بعد كده حالات- حالة في المنيا- وحالات أخرى ووضعت لجنة تصفية الإقطاع على أن تصفى الإقطاع في البلد كلها، واستطاعت أن تصفي الإقطاع في البلد كلها وتقضي على عناصر كبيرة وكثيرة من عناصر الثورة المضادة اللي موجودة في البلد- وكل واحد مستخبي في ركن في القرية أو كل واحد مستخبي في ركن في العزبة وهوه يمثل الثورة المضادة وعمل الثورة المضادة ويقتلوا في الفلاحين ويقتلوا في الناس ويأخذوا في الأرض- نقول إن تحديد الملكية 100 فدان، طلع اللي عنده 200 فدان واللي طلع عنده 300 فدان وبيضحكوا علينا. وإذا كانت الثورة ينضحك عليها تستطيع الثورة المضادة أن تتسلل وتستطيع الثورة المضادة إنها يكون لها أثر. إذن بعد كده قلنا نعمل لجنة رقابة عليا للدولة علشان هذه اللجنة إيه شغلها، شغلها إنها تتعقب هذه الثورة المضادة في كل مكان- المستغلين يمثلوا الثورة المضادة- والمنحرفين يمثلوا ثورة مضادة، والانتهازيين يمثلوا ثورة مضادة، والناس اللي يقولوا انهم مع الثورة وفي نفس الوقت عايزين يحسنوا أحوالهم ويستغلوا الثورة لمصالحهم يمثلوا عناصر من عناصر الثورة المضادة. فعلينا وعلى لجنة الرقابة العليا للدولة وعلى الاتحاد الاشتراكي في كل مكان أن يكون يقظ ويمثل الثورة ويتصدى للثورة المضادة الموجودة في كل مكان من المستغلين وأنا لما بأقول ثورة مضادة، يمكن بأديهم قيمة أكثر منهم وأنا بأقول انهم ضد الثورة، وفيه ثورة وفيه ناس ضد

<12>