(تابع) خطاب الرئيس جمال عبدالناصر، بمناسبة عيد العمال في شبرا الخيمة

حاجة قالوا إحنا بنهاجم الملك فيصل والملك حسين، وهمه عايزين يفضلوا الشغل بالدبلوماسية الهادئة وبعدين النقطة الثانية قالوا إن إحنا بنشجع العناصر الثورية في أمريكا اللاتينية، قلت له إزاي؟ قال بتشجعوا العناصر الثورية في أمريكا اللاتينية، قلت له إحنا فين وأمريكا اللاتينية فين.. والموضوع الأولاني أنا فهمه كويس، همه عايزينا إحنا نسكت وعملاؤهم يشتغلوا بدون ما حد يتعرض لهم، يطلع الملك فيصل والملك حسين يتكلموا ويقعدوا يهاجمونا ستة أشهر والأمريكان مايتحركوش، نقعد إحنا ستة أشهر وبعدين بعد ستة أشهر نبتدي نرد عليهم، بعد 24 ساعة بيجوا الأمريكان ويقولوا انتوا بتهاجموا ليه الملك فيصل والملك حسين.. يا جماعة دول بيهاجمونا بقالهم ستة أشهر يعني هذا إنكم انتم مبسوطين في الستة أشهر دول وهمه بيهاجمونا وأما إحنا نهاجمهم 24 ساعة تزعلوا، يقولوا لا مهمه أصل هجومهم ملوش قيمة لكن هجومكم انتوا له قيمة.. الله.. بقى ده كلام إذا كنا استنينا عليهم ستة أشهر وهما أصحابكم وأصدقاؤكم طيب روحوا اتكلموا مع أصحابكم وأصدقاؤكم وإحنا مش معتبرينا أصحابكم ولا أصدقاؤكم، جيين تقولوا إنكم بتفضلوا الدبلوماسية الهادية.

          الملك فيصل والملك حسين بيشغلوهم، بيشغلوهم الأمريكان والإنجليز، والإنجليز طبعاً وأمريكا أيضاً قرروا من الأول في المرحلة الأخيرة انهم مايدخلوش مع الأمة العربية ولا الثورة العربية مواجهة، ولكن ادخلوا عن طريق العملاء.. فلقوا عميل من الأسرة الهاشمية وعميل في المملكة العربية خطة أمريكا كانت توجههم وفي نفس الوقت مبنية على إن إحنا نسكت. طب ننفذ لها خطتها وإحنا نسكت مش ممكن ننفذ الخطة ونسكت. بدأ الكلام بالحلف الإسلامي، وتحت اسم الإسلام يضع المسلمين، طبعاً وافقوا على طول شّاه إيران وانضم الملك حسين. طب إحنا وقفنا ضد الأحلاف في المنطقة كلها، هل نسكت ونسيب الحلف الإسلامي يمشي، مش ممكن نسكت، هل نرى في عمل مقصود بيه وضع الأمة العربية كلها ضمن مناطق نفوذ أمريكا وإنجلترا ونسكت وألا نقاوم. خرجنا لنقاوم هذا الحلف. وإحنا بنقاوم بإيه.. محنا بنقاوم بالجماهير العربية، الجماهير العربية اللي لا ترضى العمالة ولا ترضى أن تكون في داخل مناطق النفوذ ولا ترضى أن تكون خاضعة لأمريكا أو لبريطانيا أو للاستعمار بأي شكل من الأشكال هيه اللي بتقاوم في كل بلد عربي.. وترنح الحلف الإسلامي، وقالوا لا ده تضامن إسلامي ومؤتمر إسلامي، وبعتوا جوابات فعلاً بدعوة واللي أنا أعرفه إن الردود عليهم من رؤساء الدول الإسلامية مكنتش أبداً ردود مشجعة، لأن أكثر رؤساء الدول الإسلامية اللي بيشتغلوا.. المستقلين متحررين عارفين إيه دعوة الحلف الإسلامي أو المؤتمر الإسلامي.

          دعوة تتبناها قوى الاستعمار وقوى الرجعية، إنجلترا وأمريكا ويشجعوا فيصل، وفيصل يبتدي يتكلم عن الإسلام والمسلمين والحلف الإسلامي والتضامن الإسلامي، ويعتقد إنه هيضحك على الأمة العربية كلها، والأمة الإسلامية كلها. ولكن مش ممكن يضحك عليهم يطلع فلوس ويدور يصرف.

          يصرف فلوس في كل بلد، ولكن اللي بيأخذوا فلوس مايبقاش ليهم هم إلا انهم يأخذوا فلوس وبس ولكن هل اللي بيأخذ فلوس علشان ينفذ فكر، هل بيؤمن بهذه الفكرة أو بغيرها، اللي يأخذ فلوس علشان فكرة

<14>