(تابع) خطاب الرئيس جمال عبدالناصر، بمناسبة عيد العمال في شبرا الخيمة

وتقولوا لهم على هذا الموضوع وتدوهم ولادهم- وطبعاً الشماتة كانت باينة- قطع الإذاعة والكلام باين فيه الشماتة- طيب ما اللي حيدخل معركة جوية وحيدخل محصن حيدخل بحجاب- كل يوم الأمريكان في فيتنام داخلين معركة جوية بيقع لهم 3 طيارات و5 طيارات و6 طيارات و7 طيارات ووقع لهم لغاية دالوقت 1200 طيارة لأمريكا- مش معقول- ما هي الحرب يعني إيه- هوه إحنا ندخل حرب ونقولك مش عايزين ناس تموت- ندخل حرب مش عايزين طيارات تقع- ندخل حرب مش عايزين ننضرب ما اللي بيدخل حرب بيضرب وبينضرب وبيمَوتّ وبيموت، ولكن الملك حسين وقتها كان سعيد سعادة وفي قطع الإذاعة طبعاً هو في هذا كان بيعمل إيه- ما هو أيضاً بينفذ مخططات الـ سي آي إيه أسياده، لأن الملك العميل لا يمكن في أي تصرف من تصرفاته إلا إنه يكون ملك عميل- قطع الإذاعة وأعلن لإسرائيل وقال لإسرائيل قال لليهود إنه أيوه فيه عندنا 3 طيارات سوريين وقعوا- خدم بهذا إسرائيل وقطع الإذاعة وأظهر شماتته في المعركة وأن الطيارات السورية وقعت، وبعدين بعد كده بيقول فين الدفاع المشترك ما تهمش وبعدين بيتكلم على التضامن العربي- كان فيه تضامن عربي في سنة 1948 ولكن الملك عبد الله جد الملك حسين أثناء التضامن العربي كان بيتفاوض مع اليهود وكان بيتفاوض مع موشى ديان ومع جولدا مائير وكانوا بيروحوا له في عمان ويعقدوا معاه، إزاي نتكلم النهاردة على التضامن العربي وإزاي يكون في تضامن مع الثوار ومع عملاء الاستعمار، لا يمكن بأي حال من الأحوال إنه يكون فيه تضامن بين الثوار وبين عملاء الاستعمار، أي واحد عميل للاستعمار، أي واحد خاضع لنفوذ الاستعمار لا يمكن. جربنا ومانفعتش التجربة، وافتكرنا إن عندهم شرف وعندهم ضمير- لا عندهم شرف ولا عندهم ضمير. ولكن كل واحد عايز يكون عميل لأنهم ورثوا العمالة وورثوا الخيانة واللي ورث الخيانة واللي ورث العمالة واللي اتربى في هذا الوسط وفي هذا الجو لا يمكنه بأي حال من الأحوال إنه يمشي في التضامن العربي، هوه بيبصلنا بيبص لنا كأعدائه وبيبص لإسرائيل كأصدقائه، وإسرائيل بتقول إنها لا توافق على تغيير النظام الموجود في الأردن اللي هو نظام الملك حسين والثوار العرب بأفكارهم الثورية ونداءاتهم الثورية لازم يطير الملك حسين، يبقى بالطبيعة إن الملك حسين قلباً وقالباً بيكون موجود مع إسرائيل.

          بيتكلم على التضامن العربي- بنقول له هذا الكلام لا ينطلي على أي واحد والعرب كلهم عارفين من هم عملاء الاستعمار ومن هم خدام الاستعمار ومين هم اللي خانوا ومين هم اللي ورثوا الخيانة وبيتكلم أيضاً زي الملك فيصل عن الإسلام، وكل ده معروف في العالم العربي إنه عملية الغرض منها خداع الجماهير العربية وخداع الشعوب العربية.

أيها الأخوة:

          المعركة اللي إحنا بنحاربها معركة مش سهلة- معركة كبيرة ومعركة تقودها أو تشارك فيها أمريكا، أكبر قوة في العالم، والحقيقة إن معركتنا ماهياش مع فيصل ولا مع حسين ولا مع الملحوس بورقيبة أبداً بأي حال من الأحوال ولا مع شّاه إيران، دول كلهم أدوات، أدوات بيشغلوهم الأمريكان وإحنا هذه الأدوات كلها لا

<19>